Ginpahayag sang pamunuan sang Iloilo City District Jail Female Dormitory ang ila paglaum nga matapos gilayon ang ginapatindog nga bag-o nga opisina sang Iloilo City District Jail nga nahamtang sa Barangay Buntatala, banwa sang Leganes.
Sa interview sang Bombo Radyo kay Jail Chief Inspector Imee Lopera, Acting Jail Warden sang Female Dormitory, ginpahayag niya nga ang ila nga kahimtangan sa presuhan sang una sa Iloilo City Police Office, tam-an na gid ka puno kag indi na angay sa kadamuon sang mga Persons Deprived of Liberty (PDL). Amo ini ang rason kun ngaa ginsaylo sila temporaryo sa Barangay Nanga, banwa sang Pototan.
Suno kay Lopera, ang pinakalatest nga data sang populasyon sang mga Female Persons Deprived of Liberty nagalab-ut na sa 230. Isa ini sa mga rason kun ngaa ginpangita ang mas lapad kag mas hapos nga lugar, bangud sa una nga kahimtangan sa Iloilo City Police Office nga nagadangat sa 40 tubtub 50 ka Female Persons Deprived of Liberty (PDL) ang yara sa tagsa ka selda.
Ginpabutyag man sang pamunuan nga kabudlay sang sitwasyon sang mga Female Persons Deprived of Liberty kun sa diin indi lang sila nagapangatubang sang kagutok, kundi nagakinahanglan man sang mas maayo nga kahimtangan para sa ila seguridad kag ikaayong lawas.
