ILOILO CITY – Ginpaidalom na sa Alert Level 1 ang syudad sang Iloilo epektibo subong nga adlaw, Marso 11, kag magalawig tubtob Marso 15.
Sang Martes, matandaan nga nag-apelar ang Iloilo City Goverment sa National Inter-Agency Task Force for the Emerging Infectious Diseases nga panubu-an ang classification status sang syudad.
Sa interview sang Bombo Radyo kay Iloilo City Mayor Jerry Treñas, iya ginpahayag nga ginhatagan siya sang otoridad ni Department of the Interior and Local Government (DILG) Secretary Eduardo Año nga i-anunsyo nga ang Iloilo City ang nakapasar sa tanan nga parameters.
Sa idalom sang alert level 1, 100% na ang tanan nga capacity, dulaon na ang plastic barrier, wala na sang “no vaccination, no entry” policy sa mga malls kag opisina, kag indi naman kinahanglan ang S-Pass system sa mga byahero.
Apang ginklaro sang alkalde nga magalibot sa gihapon ang compliance team agud ipasigurado nga nagasuksok sang face mask ang mga pumuluyo.
