Ginakabig sang Iloilo City government bilang isa ka dako nga kadalag-an ang pagkalakip sang siyudad bilang isa sa duha lamang ka mga siyudad sa Pilipinas sa United Nations’ 20 Cities Towards Zero Waste.
Nahibaluan nga magluwas sa Iloilo City, nalakip man ang San Fernando, Pampanga sa mga lokal nga pamunuan nga ginkilala nga nagademonstrar sang maayo kag innovative nga mga tikang agud nga mabuhinan ang higko.
Sa interview sang Bombo Radyo kay City General Services Office (GSO) Head Engr. Neil Ravena, iya ginpahayag nga isa gid ini ka dako nga pagkilala sa siyudad sang Iloilo bangud sa padayon man nga suporta ni Iloilo City Mayor Raisa Treñas sa mga programa nga nagasiguro sang katinlo sang siyudad.
Dugang pa sini nga nagatinguha gid ang ila opisina nga magamit ang mga basura nga makoletkta sang ila mga personnel nga mangin alternatibo nga fuel para sa integrated solid waste management facility sang siyudad, ilabi na subong nga nagapangatubang sang krisis sa gatong ang pungsod.
Nagapanawagan karun si Engr. Ravena sa publiko, ilabi na sa mga Ilonggo nga amligan ang dunang manggad sang siyudad kag dumilian gid ang paghaboy sang basura, ilabi na sa Iloilo river.
Sa statement naman ni Mayor Raisa Treñas, ginpanginbulahan gid sini ang tanan nga mga Ilonggo, nga may dako man nga papel sa paglab-ot sang amo nga kadalag-an.
Pahayag sang alkalde, wala sang untat ang pagpanikasog sang syudad sa pagdihon sang mga programa para sa zero waste agud nga ma-amligan ang palibot.
