ILOILO CITY- Magapahamtang sang border control checkpoints ang Iloilo City Government sa mga border barangays nga malapit sa Oton bilang tikang agud nga malikawan ang paglapta sang African Swine Fever.
Sa interview sang Bombo Radyo kay Mr. Iñigo Garingalao, Iloilo City Agriculturist, iya ginpahayag nga ang mga border control checkpoints ang iplastar sa Mohon sa Arevalo kag Calajunan kag Hibao-an sa Mandurriao.
Suno kay Garingalao, ang border controls pagabantayan sang mga katapo sang
Office of City Agriculturist, City Veterinarian’s Office, Public Safety and Transportation Management Office, Iloilo City Police Office, kag iban nga force multipliers.
May ibutang nga tire wash, foot bath, kag disinfectants.
Gin-athag naman niya nga ang mga baboy kag pork products nga wala sang mga papeles ang pabalikon lang sa place of origin kag indi pag-i-confiscate.
Base sa ginpagwa nga executive order ni Mayor Jerry Treñas, ang mga baboy kag pork products halin sa Oton ang sakop sang temporaryo nga ban.
Nagakahulugan ini nga tugutan nga makasulod sa syudad ang mga baboy kag pork products halin sa iban nga banwa sa probinsya sa kondisyon nga may yara sang ginauyatan nga Municipal Veterinary Health Certificate.
Wala man ginatugutan ang pag-ihaw sa City Slaughterhouse sang mga baboy kag livestock halin sa banwa sang Oton.
