ILOILO CITY- Nagpasar ang City Disaster Risk Reduction and Management Council sang resolusyon nga nagadeklarar sang Iloilo City sa idalom sang State of Calamity bangud sa food kag waterborne diseases.
Ini matapos nga gindeklarar sang City Health Office ang outbreak sang acute gastroenteritis (AGE) kag cholera sa diin naglab-ot na sa 90 ang kaso kag apat ang patay as of August 28.
Base sa data sang City Epidemiology and Surveillance Unit, tatlo sa 90 ang nakumpirma nga cholera cases apang nakarecover na.
18 naman ka cases ang admitted sa ospital.
Sa interview sang Bombo Radyo kay Mayor Jerry P. Treñas, iya ginpahayag nga hingyuon niya sa City Council nga magpatigayon sang special session sa Septyembre 1 agud aprubahan ang deklarasyon sang State of Calamity.
Nagpanawagan ini para sa special emergency meeting sang CDRRMC agud diskusyunan ang sitwasyon, ipatuman ang nagakaigo nga response kag magpain sang kinahanglan nga budget.May yara na sang P12 million gikan sa Quick Response Fund para sa medical personnel, supplies, bulong, kag iban nga maintenance kag operating expenses.
Gamiton naman ang modular hospital sa Sooc, Arevalo bilang temporaryo nga hydration unit para sa mild cases sang AGE.
Ang pila ka sintomas sang AGE amo ang watery diarrhea; nausea,ukon pagsuka; stomach cramps kag pain; muscle aches ukon headache; kag low-grade fever.
