ILOILO CITY – Wala na sang poder nga magperoklamar liwat sang kandidato ang Commission on Elections (COMELEC).
Ini ang reaksyon ni Iloilo City Mayor-elect Jerry Treñas kasunod sang pagpasaka ni Atty. Dan Cartagena sang petition for mandamus, injuction kag temporary restraining order sa Korte Suprema.
Ang pagpasaka sang petisyon ni Atty. Catagena ang may kaangtanan sa nabakantehan nga pwesto sang napatay nga si Iloilo City Councilor Armand Parcon.
Si Atty. Catagena ang ika 13 sa pagkakonsehal sa syudad sang Iloilo sang May 13 midterm elections.
Sa interview sang Bombo Radyo kay Treñas nga ka-partido ni Parcon sa National Unity Party (NUP), iya ginpahayag nga may yara sang kinamatarong si Cartagena nga magpasaka sang petisyon.
Sa pihak sini, ginpahayag ni Treñas nga wala na sang poder ang COMELEC nga magproklamar liwat sang kandidato bangud nga natapos na ang eleksyon.
Magluwas diri, ginpahayag ni Treñas nga sa bahin ni Parcon, ang partido nga NUP amo ang magadesisyon kun sin-o ang magabulos kay Parcon kag ini amo ang anak nga si Atty. Frances Parcon.
Ginhalimbawa pa sang incoming Iloilo City Mayor ang nabakantehan nga pwesto nanday anay Iloilo City Councilor Lex Tupas nga nagsaylo na sa National Youth Commission (NYC) kag ang pagpahalin sa pwesto kay dismissed Iloilo City Mayor Jed Patrick Mabilog.
Sa bahin ni Tupas, ginpahayag sang natungdan nga si Iloilo City Councilor Candice Tupas nga sadto anay nagatrabaho pa bilang doktor ang nagbulos sa iya bana.
Sa bahin naman ni Mabilog, nagsaka si Vice Mayor Jose Espinosa III bilang mayor kag si number 1 Iloilo City Councilor Jeffrey Ganzon bilang bise alkalde.
Ang partido ni Ganzon ang nagdesisyon kun sin-o ang nagbulos sa iya nabakantehan nga pwesto sa pagkakonsehal.
