ILOILO – Ginsapol ni Iloilo City Mayor Jerry Treñas ang 46 ka mga barangay sa syudad sang Iloilo nga wala nakapasar sa ginpatigayon nga validation sang Department of Interior and Local Government may kaangtanan sa Oplan Hawan kaupod man ang Public Safety Transportation and Management Office.
Sa interview sang Bombo Radyo kay Treñas iya ginpahayag nga, kalabanan sa mga barangay nga wala nakapasar ang nakakuha sang grado nga 23 tubtob 25.
Suno kay Treñas, wala sila nagkulang sa pagpahanumdom sa mga barangay officials natuhoy sa pagpanghawan sa mga sablag sa ila dalan base man sa mandu sang Department of Interior and Local Government.
Dugang sang natungdan, indi na niya luyag pa nga maglab-ot sa tion nga kinahanglan niya magpasaka sang kaso administratibo bangud may wala sa gihapon sang nagtuman sa mandu sang DILG sa sulod sang 75 ka adlaw nga plaso nga ila ginhatag.
Santo sa pahayag sang alkalde, bukas man ang ila talatapan agud magbulig sa mga kinahanglanon sang mga barangay apang nagakinahanglan man nga ubrahon nila ang ila katungdanan.
May kaangtanan naman sa illegal parking nga masami problema sang mga barangay councils sa ginpahayag sang alkalde nga ginahitso na nila subong ang plano nga pagpatukod sang parking building sa syudad.
Suno sa alkalde, makigsapol pa siya sa kaupod ang pamunuan sang Development Bank of the Philippines agud istoryahan ang plano sang Iloilo City Government natuhoy sa pagpatukod sang parking building nga mahimo magamit sang mga pumuluyo agud mabuhin ang problema sa illegal parking sa syudad.
Sa diin ginatan-aw nga posible pahamtangan sang parking building amo ang lote nga ginapanag-iyahan sang DBP malapit sa Iloilo City Hall.
