ILOILO CITY- Naghingyo ang Iloilo City Veterinary Office sa mga negosyante sang baboy nga indi mangin sakun agud ihawon kag ibaligya pa ang mga baboy apisar nga nagamasakit ang amo nga sapat.
Sa interview sang Bombo Radyo kay Dr. Suzette M Leal, Veterinarian IV sang Office of the City Veterinarian, iya ginpahayag nga agud mauntat na ang paglapta sang virus, dapat nga magkooperar ang mga stakeholders kag manug- ihaw sang baboy kag indi magpamentaha kag pangispuslan pa ang baboy ,ihawon kag ibaligya.
Dugang pa sang natungdan ,gina- discourage sini anay ang pagpakaon sang damog sa mga baboy kag kun indi man malikawan, lutuon anay ini sa kalayo sa sulod sang 30 minutos.
Nagpaandam man ini nga sa tion nga ihawon ang infected nga baboy kag gamiton nga processed foods, ang virus mahimo nga magtinir sa sulod sang tatlo tubtob anom ka bulan samtang kun chilled meats naman, mahimo magpabilin ang virus sa sulod sang 16 ka semana.
Ginahingyo man niya nga bilang kabahin sang prevention, indi basta-basta nga magpasulod sang outsider sa mga tangkal apang kun kinahanglanm dapat nga i-disinfect anay ang mga ini bilang kabahin sang biosecurity kag paghalong sang mga hog- raisers.
