ILOILO CITY – Nagpalab-ot sang pasaylo si Iloilo City Vice Mayor Jeffrey Ganzon sa pumuluyo pinaagi sa Bombo Radyo Iloilo matapos wala nasunod ang health protocol sa ginhiwat nga pagpanagtag sang ayuda gikan sa Department of Social Welfare and Development (DSWD) sa Iloilo Freedom Grandstand.
Sa exclusive interview sang Bombo Radyo kay Ganzon, nagpangayo siya sang pasaylo sa mga pumuluyo sang Syudad sa ginpatigayon nga pictorial sa diin wala natuman ang physical distancing.
Pahayag sang bise alkalde, gilayon man siya nagbayad sang multa bangud sa nalapas nga pagsulundan.
Leadership by example suno kay Ganzon ang iya ginapatihan nga dapat ipakita sang isa ka opisyal sang gobyerno gani na konsensya gid siya sa natabo.
Nagpasalig man ang bise alkalde nga indi na masulit pa ang kaangay nga hitabo kag mangin responsable na sa masunod.
Matandaan nga nag-angkon sang pagpakamalaot sa publiko ang mga opisyal sang syudad bangud wala nasunod ang physical distancing sa pihak nga may existing Executive Order si Mayor Jerry Treñas nga nagadumili sa pumulyo sang pagtililipon sa publiko.
May mga naglapta man nga picture sang nasambit nga aktibidad sa diin nakit-an nga wala nagatuman sang social distancing sanday Iloilo City Lone District Rep. Jamjam Baronda, Iloilo City Mayor Jerry Treñas, Iloilo City Vice Mayor Jeffrey Ganzon, kag City Councilors Ely Estante, Jojo Javellana, Allan Zaldivar kag Rudolph Ganzon.
Kaupod man sa aktibidad si Jeck Conlu, nga amo ang pinuno sang Public Safety and Transportation Management Office PSTMO kag spokesperson sang COVID-19 team sang Iloilo City Government.
Present man sanday Fernando Jose “Boyet” Rico, Punong Barangay Roberto Niño sang Calumpang, Molo, Iloilo City nga amo man tagpamaba sang Liga ng mga Barangay kag Punong Barangay John Eric David sang Veterans Village, Iloilo City Proper.
Yara man sa aktibidad ang mga anak ang alkalde nga sanday Raisa kag Miguel Treñas.
Mangin ang negosyante nga si Johny Young ang nag-upod man sa event.
