ILOILO CITY – Ginkalipay sang Iloilo City Government ang zero case sang COVID-19 sa syudad sang Iloilo subong nga adlaw.
Sa exclusive interview sang Bombo Radyo kay Iloilo City Mayor Jerry Treñas, iya ginpahayag nga may lima ka rason sa pagnubo sang COVID-19 cases sa syudad sang Iloilo.
Ini amo ang mga masunod:
- Holistic approach sa diin ang mga barangay officials kag mga nagkalain-lain nga sektor sang sosyudad ang ginasapol kag ginapaidalom sa COVID-19 response seminars.
- Pagbulig sang media sa pagpalanag sang nagakadapat nga himuon sa pagtapna sang COVID-19.
- Madasig nga pagpagwa sang resulta sang Reverse transcription polymerase chain reaction (RT-PCR) test sa diin sa sulod lang sang duha ka adlaw mahibaluan kun ang isa ka pasyente ang positibo ukon negatibo sa virus.
- Hugot nga pagpatuman sang health protocol sa diin halimbawa na ang pagdugok sa mga haya, lubong kag pag-inom sa mga pampubliko nga lugar.
- Pag-ugyon sang compliance team kag sang Philippine National Police sa diin ang mga madakpan nga nagalapas sa health protocol ang ginapaidalom sa community service sa tion nga indi ang mga ini makabayad sang penalidad.
Nagalaom naman ang alkalde nga magapadayon ang pagnubo kag dalayon na nga madula ang COVID-19 cases.
