ILOILO – Indi pa makadeklara sang state of calamity ang probinsya sang Iloilo bangud sa halit nga epekto sang bagyo Kristine.
Sa interview sang Bombo Radyo kay Retired PCol. Cornelio Salinas, head sang Provincial Disaster Risk Reduction and Management Office, iya ginpahayag nga ang requirement sa pagdeklara sang state of calamity ang dapat yara sa 30% sang total population ang naapektuhan kag wala diri nakasulod ang Iloilo.
Sa data sang PDRRMO, 114,945 individuals ang apektado ukon 30,132 ka mga pamilya halin sa 24 ka mga kabanwahanan.
Suno kay Salinas, may mga nagkalaguba man nga balay tuga sang bagyo nga naglab-ot sa 7,737 sa diin 7,557 ang partially damaged kag 180 naman ang totally damaged.
Sa agrikultura, naglab-ot sa P23,783,695.02 ang halit sa nasambit nga sector sa diin ang humay ang may pinakadako nga kahalitan nga may P18,676,437.22 .
Ginasundan ini sang High Value Crops nga may P1,810,471; ang Fisheries nga may P1,799,721.80; Livestock and Poultry nga may P24,000 kag Corn nga may P1,473,065 nga cost of damage.
Samtang may reported nga 79 ka mag fishing boats nga partially damaged kag 13 ang totally damaged.
Ginkasubo naman sang natungdan nga may yara sang isa nga napatay sa Barangay Bagacay, San Rafael bangud aksidente nga nahulog halin sa atop.
