ILOILO CITY- Nagalaum ang grupo sang mga medical frontliners sa Iloilo nga mahatagan sang maabtik nga sabat sang gobyerno ang ila ginahingyo nga bulig sa tunga sang nagalala nga COVID-19 situation.
Sa interview sang Bombo Radyo kay Dr. Jimmy Jay Bullo, Presidente sang Iloilo Medical Society, iya ginpahayag nga sa appeal letter nga ginpadala sang asosasyon kay Presidente Rodrigo Duterte, ginpatpat nila ang nagataas nga kaso sang COVID-19 sa syudad kag probinsya nga katumbas naman sang pagnubo sang medical resources.
Suno kay Dr. Bullo, pila sa ila ginpangayo nga bulig amo ang pagdugang sang allotment sang COVID-19 vaccines para sa Iloilo agud nga mas madasig nga malab-ot ang herd immunity; pag-augment sang medical personnel sa pampubliko kag pribado nga ospital; dugang nga medical equipment kaangay sang high flow oxygen cannulas kag ventilators; probisyon sang ginakinahanglan nga bulong ilabi na ang remdesivir nga manubo ang supply; kag pagpadasig sa Philhealth nga bayaran ang pinansyal nga obligasyon sa mga ospital kag iban nga health facilities agud nga masalbar ang stability sang sini nga mga institusyon.
Pahayag sang natungdan, sa tion nga mapabay- an ini nga mga kakulangan, pat-ud nga magaresulta ini sa mas seryoso nga mga problema sa palaabuton.
