ILOILO CITY- Gina-imbestigaran sang Iloilo Provincial Government Environment and Natural Resources Office ang daan na nga quarry site sa Barangay Sulangan, Dumangas, Iloilo kun sa diin natabo ang rockslide nga ginkamatay sang 19 anyos nga babaye.
Sa interview sang Bombo Radyo kay Atty. Cezar Emmanuelle Buyco Jr., Head sag Provincial Government Environment and Natural Resources Office, iya ginpahayag nga sang natabo ang insidente sang Septyembre 2, 2023, gilayon siya nga nagpadala sang isa ka team agud nga maimbestigaran ang lugar.
Suno kay Atty. Buyco, nakumpirma sang team nga ang area ang ginakonsiderar nga daan na nga quarry site kag legally permitted ini kag nauntat lang apang may yara sang iligal nga nagpadayon sang operasyon sa diin wala gid sang may nag-report bangud tago ang area.
Dugang pa niya, kun legal ang operasyon, sa katapusan kuntani sang permit, gina-rehabilitate na ang lugar, may yara kuntani sang rehabilitation plan sa diin may ginabilin nga area ang quarry operators nga safe para sa mga may plano nga magpatindog sang istruktura.
Paathag niya, kun matapos ang termino sang permit, siguraduhon dapat nga mangin safe ini sa tawo kun ano man nga development ang luyag ibutang.
Natukiban naman sang nasambit nga opisina nga wala sang rehabilitation plan nga patimaan nga iligal ang nangin operasyon sang quarry.
