Ginahandaan sang Iloilo Provincial Government ang posible nga pagdeklara sang state of calamity bangud sa padayon nga pagsaka sang presyo sang gatong sa pungsod.
Sa interview sang Bombo Radyo kay Iloilo Governor Arthur Defensor Jr., iya ginpahayag nga gin-convene na ang Provincial Community Defense Cluster agud preparahan ang posible nga deklarasyon.
Suno sa gobernador, kinahanglan anay sang nagakaigo nga datos halin sa mga kabanwahanan antes patigayunon ang nasambit nga plano kag ginahulat man nila nga may duha ka banwa nga magdeklara sang state of calamity bilang basehan.
Nahibaluan nga sa subong, may yara na sang duha ka kabanwahanan nga nagdeklara kag amo ini ang banwa sang Ajuy kag New Lucena, Iloilo.
Dugang pa ni Defensor nga kinahanglan nga tun-an ini kaupod ang mga department heads agud lantawon ang mga praktikal nga pamaagi base sa available nga resources sang probinsya.
Nahibaluan nga may ara sang P82 milyon nga quick response fund ang probinsya nga mahimo gamiton para sa emergency measures kun matigayon ang deklarasyon.
