Umpisahan na sang Iloilo provincial government subong nga adlaw, Hulyo 22, ang serye sang konsultasyon para sa ginaduso nga Local Public Transport Route Plan (LPTRP).
Sa interview sang Bombo Radyo kay Mr. Mario Nillos, head sang Provincial Planning and Development Office (PPDO), iya ginpahayag nga magasapol subong ang provincial government sa transport sector sang Lemery, San Rafael, kag Calinog.
Sa Hulyo 27 naman umpisahan ang konsultasyon para sa developmental routes kag lakip sa namensyonar nga imbitado amo ang Oton, Cabatuan, Maasin, Sta. Barbara, kag San Miguel.
Dal-on man sa pagsinapol ang tiglawas halin sa Department of the Interior and Local Government (DILG) bangud madalasa sa sini nga developmental routes ang byahe sang mga traysikol.
Ini bangud, suno kay Nillos, may mga naga-agi nga tricyle sa national roads apisar nga ginadumilian na ini sang DILG.
Ginalantaw sang probinsya nga kun ipatuman na ang LPTRP, pat-od nga ma-reklamo ang tricycle drivers bangud maapektuhan ang ila nga palangabuhian.
Sa Agusto 5 naman, may virtual nga province-wide nga pagsinapol kag lakip sa imbitado amo ang mga eskwelahan, transport cooperatives (lakip na ang Vallacar Transit), kag municipal local government units.
Sa sini nga meeting suno kay Nillos, i-present per district ang 59 ka rationalized routes kag ang siyam ka developmental routes.
Sa timeline sang provincial government, target nga mapasa ang final nga Local Public Transport Route Plan (LPTRP) sa Department of Transportation (DOTr) sa Agusto 8. ##
