ILOILO CITY – Ginapabugal sang Iloilo Tinagan School of Martial Arts Incorporated ang tatlo ka mga Ilonggo Atheletes nga gold medalist sa Wushu Sanda sa 30th Southeast Asian Games.
Ang mga atleta amo sanday Jessie Aligaga gold medalist sa 48kg Men’s Division; Arnel Roa Mandal gold medalist sa 52 kg Men’s Division kag Francisco Solis gold medallist sa 56 kg Men’s Division.
Sa interview sang Bombo Radyo kay Arnold Tinagan, wushu trainer, iya ginpahayag nga ang tatlo ka mga atleta ang iya mga estudyante nga ginhanas mismo sa Iloilo Tinagan School of Martial Arts Inc.
Ang wushu ang isa ka chinese martial art nga kominasyon sang judo, wrestling, karate kag boxing.
Suno kay Tinagan, mga mabuot kag mapisan sa training sanday Aligaga , Mandal kag Solis.
Tuman ang kalipay nga nabatyagan ni Tinagan bangud tatlo gid sa iya mga ginhanas sa wushu ang lunsay mga kampeonato sa 2019 Southeast Asian Games.
Pahayag niya, nagapadayon ang training sang wushu sa Iloilo kag nagapadayon man ang pagpangita ni Tinagan sang mga atleta nga mangin masunod nga tiglawas sang Pilipinas sa national kag international sporting event.
Apang nagpangabay si Tinagan nga kun may mga training kag hampang ang wushu sa Iloilo, kuntani suportahan man ini sang sponsoran sang kadam-an.
