ILOILO – Wala sang narecord nga nabiktima sang motor riding suspects nga may kaangtanan sa ilegal nga droga sa syudad sang Iloilo.
Base sa data sang Police Regional Office 6, sa Western Visayas may yara na sang 152 nga kaso sang nabiktima sang riding in tandem humalin sang Enero 1 tubtob Nobyembre 18 subong nga tuig kun sa diin lima ang may kaangtanan sa ilegal nga droga.
Tatlo diri ang sa Negros Occidental kag duha sa Bacolod City nga isa sa mga ginatutukan nga syudad sa Western Visayas bangud sa madamo nga kaso nga may kaangtanan sa ilegal nga droga.
Sa kabilugan nga 152, 20 diri ang na clear na ukon natumod na ang identity kag motibo apang wala naaresto ukon nagapabilin nga atlarge ang suspetsado, 55 naman ang wala pa na solbar kag 77 ang padayon pa nga gina imbestigaran.
Madumduman nga sunod-sunod ang kaso sang nabiktima sang riding in tandem ukon motor riding suspects kun sa diin kalabanan diri ang napaslawan.
Sa interview sang Bombo Radyo kay Pol Lt Col Joem Malong, tagapamaba sang Police Regional Office 6 iya ginpahayag nga isa sa mga rason kun ngaa indi pa ma kumpirma sang mga kapulisan kun ang mga nasambit nga numero sang kaso drug related amo ang depektibo kag palyado nga mga Closed Circuit Television kag wala sang nagapangisog nga mag tindog bilang testigo.
Suno kay Malong, paagi sa pag identify sang identity sang mga motor riding suspects, mahibaluan ang motibo sang krimen kag diri man ma klaro kun may kaangtanan ini sa ilegal nga droga.
Nagpasalig naman ang natungdan, nga padayon nila nga gina imbestigaran ang 77 pa ka kaso sang insidente sang riding in tandem sa Western Visayas agud mahibaluan kun ini ang may kaangtanan sa ilegal nga droga.
