ILOILO CITY- Arestado sa ginpatigayon nga entrapment operation sang Criminal Investigation and Detection Group ang isa ka iloy kag ang isa ka paltera matapos nadakpan sa akto nga ginabaligya ang lapsag nga nagaedad sang lima pa lang ka adlaw sa balor nga P25,000.
Ang iloy amo si Edelyn Pendon, 29, samtang ang paltera amo si Ana Agustin Montalbo, 53, lunsay mga residente sang Zone 6, Brgy. Boulevard, Molo, Iloilo City kun sa diin natabo ang operasyon.
Sa interview sang Bombo Radyo kay PMaj Jess Baylon, chief sang Criminal Investigation and Detection Group- Iloilo City Field Unit, iya ginpahayag nga madugay na nila nga gina-validate ang impormasyon nga may nagakatabo nga lapnagon nga baligyaanay sang lapsag.
Suno kay Baylon, ang pagkadakop sa duha ang kumpirrmasyon lang nga may kasubong nga modus nga nagaeksister sa syudad.
Kaso nga paglapas sang Repulbic Act 9208 ukon Anti- Trafficking in Person Act of 2003 ang atubangon sang mga arestado.
Gintuad pa ni Baylon nga magluwas sa pagbaligya sang mga lapsag, isa man ka aborsyonista ang nasambit nga paltera.
Depensa naman ni Edelyn Pendon, wala ini sang tuyo nga ibaligya ang iya bata kag sa baylo, luyag lang kuntani niya nga ipa-adopt ini.
Suno kay Pendon, wala siya sang ihibalo tuhoy sa amo nga kantidad sang kwarta kabaylo sang iya bata.
Baliskad sa pahayag ni Pendon, ginsiling naman sang paltera nga ang ginikanan mismo sang bata ang naghingyo nga mangayo sang kwarta kabaylo sang lapsag bangud may yara sila sang importante nga galastuhan.
