Ginhangkat man sang dako nga pagtilaw sa kabuhi, wala nalingkang ang pagtuo sang isa ka iloy apisar na-diagnose ini nga may ara sang breast cancer.
Sa interview sang Bombo Radyo kay Nanay Angie Pastolero Balatongle, iya ginsaysay ang kasakit kag kabudlayan nga na-eksperyensyahan sini sa iya kabuhi ilabi na sang tion nga nahibaluan sini nga magluwas sa cancer may ara pa ini sang gallstone kag cyst kag kinahanglan sini nga mag-undergo sang 3-in-1 operation.
Ginpahayag sini nga antes sang operasyon, nagdesisyon ini nga magkumpisal anay agud suno sa iya mangin handa ini sa bisan ano nga mahimo matabo bangud may ara man ini sang sakit sa tagipusuon, hypertension kag thyroidism.
Suno pa sa iya nga samtang ginapatigayon ang operasyon, nabatyagan sini nga madamo gid sang mga tawo ang nagapangamuyo para sa iya rason man kun ngaa ginsalig sini ang tanan sa Diyos.
Suno pa kay Balatongle, dako gid ang bulig sang pamilya sa tion sang kasakit kag kinahanglan nga magbinuligay ang tagsa ka miyembro bangud paagi sini makaya sang pamilya nga matalampuwasan ang tanan nga pagpanghangkat.
Nagbilin man ini sang mensahe sa kaangay sini nga iloy nga naga-atubang sang mabudlay nga sitwasyon nga suno pa sa iya kinahanglan mangin sensitibo gid ilabi na sa emosyon sang ila nga kabataan kag indi gid madulaan sang paglaom sa Diyos.
Gindugang pa sini nga wala sang may ginahatag nga problema ang Diyos kun indi makaya sang isa ka tawo gani indi dapat madulaan sang paglaom bangud permi ini nga nagahatag.
