ILOILO CITY- Ginabalay sa gihapon sang Department of Social Welfare and Development (DSWD) ang Implementing Rules and Regulation (IRR) para sa dugang nga kantidad sa social pension sang mga indigent nga senior citizens sa pungsod.
Ini matapos nga nangin layi na ang hagna nga nagduso sang dugang nga P500 sa social pension sa diin mangin P1000 ang mabaton nga ayuda sang mga kamal-aman.
Sa interview sang Bombo Radyo kay Mariecar Labinghisa, Social Welfare Officer II sang DSWD Region 6, iya ginpahayag nga nagahulat pa sila sang IRR kag kun mahuman na ini, diri na kag iplastar ang mga guidelines sa pag-avail sang amo nga social pension.
Suno kay Labinghisa, sa subong, yara sa status quo sa diin P1500 ang mabaton sang kada indigent senior citizen sa kada quarter ukon 500 kada bulan.
Nahibaluan nga sa bilog nga Western Visayas, yara sa 360,608 ang mga lolo kag lola nga beneficiaries sang ayuda.
