ILOILO – Indi pa makumpirma ni Tigbauan Mayor Suzette Tenefrancia-Alquisada ang nagalapta nga impormasyon nga may yara sang nagpositibo sa Coronavirus Disease 2019 (COVID-19) sa Tigbauan.
Sa interview sang Bombo Radyo kay Alquisada, iya ginpahayag nga tubtob subong nga aga, wala pa sang official pronouncement ang Department of Health may kaangtanan sa amo nga ginatumod nga kaso.
Apang, ginpahayag sang alkalde nga matuod nga sa subong, may yara sang anom ka Persons Under Investigation (PUIs) sa Tigbauan.
Lakip sa amo nga PUIs amo ang lima ka Overseas Filipino Workers (OFWs) nga nag-abot sa nasambit nga banwa sang Hwebes, Abril 9, kag gilayon man nga ginpatigayon ang swab test sang Biyernes, Abril 10.
Dugang pa, may yara man sang isa ka residente nga naka-close contact sang COVID-19 positive nagikan sa Pavia, Iloilo.
Sa subong, ginahulat na lang ang resulta sang test sang anom ka PUIs kag suno kay Alquisada, bilang alkalde kag bilang ‘attorney in profession’, nagahulat siya sang opisyal nga ebidensya agud mahatag ang kumpirmasyon sa mga pumuluyo.
Ginpasalig man sang natungdan nga ang nasambit nga PUIs ang nagapaidalom sa strict quarantine kag wala ginatugutan nga makaupod sa iban nga tawo.
