ANTIQUE – Indi na dapat maghulat ang gobyerno nga magutman ang tanan nga tawo nga nadulaan sang trabaho nga amo ang mahimo tunaan sang pagsaka ang numero sang mga krimen kaangay sang kinawatay.
Ini ang paathag ni Antique Governor Rhodora Cadiao kun ngaa tuman ka importante ang ‘balanse’ kag ang pagtatap sang ekonomiya subong nga kritikal nga tion nga may pandemya.
Sa interview sang Bombo Radyo kay Cadiao, iya ginpahayag nga indi lang dapat pag-iubos ang tanan nga tiempo kag resources sa COVID-19 bangud may iban pa nga balatian nga kinahanglan ulikdan kag may iban pa nga dapat kabalak-an sa mga pumuluyo.
“Kun puro COVID-COVID, te ang psychology kang tawo nagakahadlok sila… ga-panic. Instead nga ordinaryo lang nga nga nagbata, nagdugo-dugo, medyo nagkaroon ng problema kag nag-grabe, ‘ah COVID na na. COVID na na.’ And then nag-abot sa panahon nga kun lantawon mo ang datos, mas duro pa gali nagkaramatay sa iba nga sakit,” pahayag ni Cadiao.
Sa Antique suno sa iya, mas madamo pa ang narekord nga patay sa dengue ipaanggid sa 10 nga reported nga napatay bangud sa coronavirus.
Sa 2020 data nga ginpagwa sang Philippine Statistics Authority (PSA), naga-gwa nga ikapito ang COVID-19 sa mga nagapanguna nga rason sang kamatayon sa Pilipinas sang 2020.
Ang una nga tatlo ka leading cause of death sa pungsod amo man ang leading cause of death sang 2019: ischaemic heart diseases (99,680 death), neoplasms (62,289 deaths), kag cerebrovascular diseases (59,736 deaths). Sunod diri amo ang diabetes mellitus (37,265 deaths), pneumonia (32,574 deaths), kag hypertensive viruses (29,511 deaths).
Ikapito sa sini nga numero ang COVID-19 virus [not identified] nga may 19,758 apang 70% sa sini ang wala gin-report kag indi kumpirmado sang DOH [likely patients who had not been tested for SARS Cov2].
Suno kay Cadiao, dapat nga i-reevaluate sang gobyerno ang posisyon kag ang concentration subong nga may pandemya.
“If we do not take care of our economy and people will go hungry because they do not have jobs, crime will rise. Duro na siya nga budol-budol, nakawan, patyanay,” paathag sang gobernador.
Panugyan pa ni Cadiao, “There should people who take care of our COVID and there should be people who take care of our economy and other diseases happening in the Philippines.”
Sa Antique suno sa iya, ginasigurado sang local government units nga sa walo ka district hospitals kag isa ka provincial hospital, may yara gid sang magatatap sang lain nga balatian kag may yara sang sarang dalaganan ang tawo.
As of April 8, ang Antique ang may 409 nga kabug-usan nga kumpirmado nga kaso sang COVID-19, 10 ang reported deaths, 148 recoveries, kag 251 active cases.
