Nakit-an sang militar ang indi otorisado nga Chinese research vessel sa northeast nga bahin sang Viga, Catanduanes.
Suno sa Armed Forces of the Philippines (AFP), una nga nakit-an ang China-flagged vessel nga “SHEN KUO” sang Huwebes, Abril 25, sa kalayuon nga 60.9 nautical miles east sang Rapu-Rapu Island, Albay.
Wala sang personnel sa main deck suno sa latest reports halin sa Tactical Operations Wing Southern Luzon nga amo ang nagpatigayon sang maritime patrol sang Abril 27.
Wala man nangin madinalag-on ang tuyo sang militar nga kontakon ang vessel paagi sa regular radio channels bangud wala sang may nagasabat sa pihak nga linya.
Kaangot diri, ginmanduan sang militar ang malapit nga mga barko nga pasangkaron pa ang surveillance kag ang reporting kag magpakig-angot man sa nagakaigu nga mga ahensya agud nga maaktuhan gilayon ang indi otorisado nga presensya sang iban nga mga pungsod kag ila iligal nga aktibidad sa teritoryo sang Pilipinas.#
