Nag-ululupod ang law enforcement officials halin sa Ukraine, European Union, kag United States agud magbukas sang international center agud mag-establisar sang mga kaso batok sa pagpang-atake sang Russia sa Ukraine.
Ini ang ginatawag International Centre for the Prosecution of the Crime of Aggression nga naka-base sa The Hague sa Netherlands kun sa diin yara man ang International Criminal Court (ICC).
Suno sa Ukrainian top prosecutor nga si Andriy Kostin, ini nga bag-o nga center ang magatipon sang mga ebidensya sa posible ikaso batok sa Russian military kag political leaders nga responsable sa away sa Ukraine.
Suportado ini sang European Union, United States, kag Joint Investigation Team for Ukraine, kag ini ang mangin forerunner sang special tribunal para sa pagpang-atake kag maka-file sang kaso nga mahimo mapasaka sa korte.
Nahibaluan nga sa subong, gina-review na sang Ukrainian authorities ang masobra 93,000 ka reports sang war crimes kag naka-file na sang kaso sa 207 ka mga suspek sa domestic courts. #
