ILOILO – Wala pa sang matul-id nga resulta sa ginpatigayon nga imbestigasyon sang Dingle Municipal Police angot sa pagpatay kay Dave Ablanzar nga myembro sang lesbian, gay, bisexual, transgender, queer community.
Matandaan nga nasapwan ang lawas ni Ablanzar nga gintampukan sang dahon, nakaputos sa manipis nga habol, kag ginbilin sa katubuhan sa Barangay Tinocuan, Dingle, Iloilo sang Mayo 15.
Ang mga suspek sa krimen amo sanday Andrei Ticar, 20; kag Alyas ‘Jun’, 17-anyos.
Sa interview sang Bombo Radyo kay Police Major Rolando Araño, spokesperson sang Iloilo Police Provincial Office, iya ginpahayag nga ginapadalman pa sang kapulisan ang matuod-tuod nga natabo antes ang krimen sa diin ginahibalo pa kun nagdepensa lang ang mga suspek ukon posible nga ginkawatan sang mga ini ang biktima.
Suno kay Araño, base sa pahayag sang mga suspek, ginhagad ni Ablanzar si Alyas Jun nga magsulod sa kwarto agud makighilawas, apang nagpamalibad ang suspek, rason nga ginbuno ini sang biktima sa kamot.
Ginpahayag dugang sang natungdan nga nagbato pa ang biktima, apang ginpakamaayo sang mga suspek nga kug-on ini asta nga ginbawian sang kabuhi.
Nagsungka naman ang mga suspek, apang ginhilway bangud wala nakapagwa sang affidavit of extrajudicial confession ang mga suspek sa ginhimo nga krimen.
