Nagpahanumdom si Rev. Fr. Aris James Java, sa iya homily kaina sang aga sa Jaro Metropolitan Cathedral kadungan man sang pag-selebrar subong nga adlaw sang Mother’s Day nga e-apresyar gid ang tanan nga binuhatan kag sakripisyo sang isa ka iloy.
Suno pa sa iya nga dapat mangin mapinasalamaton sa tanan nga pagpalangga nga ginbugay sang Diyos bangud kaangay sang pagpalangga sang isa ka iloy labaw pa dira ang pagpalangga sang Diyos sa mga tawo nga nagapaubos sang ila kaugalingon.
Ginpahayag man sini nga indi gid magkalipat sa pagdangop sa mga butang nga kinahanglan ang pag-ubay sang Diyos bangud ang iya nga bulig magaabot.
Suno pa sa iya nga sa sini nga kabuhi may mga butang gid nga wala pa mahibaluan sang tawo gani nga importante ang paggiya sang Diyos.
Gina-agda sini ang publiko nga magdangop permi kag magpangayo sang bulig sa Espiritu Santo agud magiyahan sang matarong nga pamaagi kag dalan sang Diyos.
Ginlaygayan man sini ang mga tumuluo nga magpadayon sa pagpamati kag pagsunod sa Diyos agud mangin matarong kag mangin malinong ang kabuhi sini.
Gindugang pa ni Father Java nga indi gid pagkalimptan ang sugo sang Diyos nga magpinalangga-anay kag maghirupay bangud isa ini sa iya gusto nga matabo sa sini nga kabuhi.
