Gin-istoryahan nanday Pope Francis kag US President Joe Biden ang away sa tunga sang Israel kag Hamas amo man ang iban pa nga gyera sa kalibutan.
Suno sa Vatican, naka-istoryahanay ang duha paagi sa telepono nga naglawig sang 20 minutos. Diri man suno sa Vatican natutukan ang pag-kinahanglan nga makatumod na sang paagi kun paano mabalik ang kalinong sa magtimbang nga bahin.
Photo: CBS
May separado man nga pag-istoryahanay sanday Biden kag si Israeli Prime Minister Benjamin Netanyahu.
Nahibaluan nga naga-preparar ang Israel sang mas daku pa gid nga pagsalakay paagi sa ground assault sa Gaza duha ka semana matapos ang pagpang-atake sang Hamas nga nagpatay sang ginabanta 1,400 ka mga taga-Israel kag may nagapabilin nga masobra 200 ka mga bihag.
Kasunod naman sang traditional Angelus prayer sa Saint Peter’s Square sa Roma, naghingyo liwat si Pope Francis nga buksan na liwat ang alagyan para makasulod ang humanitarian aid sa Gaza kag dapat man nga hilwayon na ang hostages.
“War is always a defeat, it is a destruction of human fraternity. Brothers, stop! Stop!,” suno sa Santo Papa. “I renew my call for spaces to be opened, for humanitarian aid to continue to arrive and for hostages to be freed.”
Lakip man sa nagpalala sa sitwasyon sa Gaza sang tinalikdan nga adlaw amo ang pagpang-atake sa isa ka Anglican hospital kag Greek Orthodox church. #
