Indi magpasugot ang Israel nga maghatag sang humanitarian break sa Gaza Strip tubtub nga indi pagbuy-an sang militante nga grupo nga Hamas ang tanan nga mga bihag.
Ini ang sabat ni Energy Minister Israel Katz kasunod sang apelar sang International Committee of the Red Cross nga pahanugutan ang pagbalik sang fuel antes pa mahimo nga mga morgue ang puno na nga daan nga mga ospital.
Pahayag ni Katz, indi nila pag-ibalik ang suplay sang kuryente kag tubig kag indi pagpa-agyon ang fuel truck tubtub nga indi makapauli ang ginabanta 150 ka mga Israeli hostages.
Ang pag-atake sang Israeli Army kag pagpaidalom sa Gaza Strip sa total siege ang kabahin sang ila nga pagtimalos kasunod sang makamamatay nga pagpang-atake man sang Hamas militants sa Israel sang Sabado kun sa diin ginatos ang patay.
Photo: Mohammed Salem/Reuters
Ang Gaza nga puluy-an sang 2.3 milyon ka mga tawo ang ginguba man sang Israel paagi sa ila pagpamomba nga amo ang pinakamabaskog sa sulod sang masobra pito ka dekada nga away sang Israel kag Palestine.
Ginpatay ang naga-isahanon nga electric power station sa Gaza nga rason nga nahubsan sang fuel ang mga ospital nga amo kuntani ang kinahanglanon para sa emergency generators.
Bangud sini suno sa Red Cross, nabutang sa alang-alang pati ang mga bata nga yara sa incubator kag ang mga tigulang nga nagakinahanglan sang oxygen. Nag-untat man ang kidney dialysis, wala na sang X-rays, kag “amat-amat na nga nagakahimo nga morgue ang mga ospital.”
Sa rekord naman sang U.N. Office for the Coordination of Humanitarian Affairs, yara na sa 340,000 sa 2.3-milyon nga populasyon sang Gaza ang na-displace bangud sa gyera kag 65% sa ila ang nagatinir sa mga shelter kag sa mga eskwelahan. #
