Ginalauman nga mas madamo pa nga Carlos Yulo ang ma-produce sang Pilipinas paagi sa assistance nga ginhatag sang Japan agud mabuligan ang gymnastics grassroots program sa pungsod.
Kadungan ini sang pag-sapubliko na sang Gymnastics Association of the Philippines (GAP) kag sang Embassy of Japan sang bag-o nga gymnastics training center bilang kabahin sang Cultural Grassroots Project sa Rizal Memorial Complex.
Suno kay GAP President Cynthia Carrion, katuyuan sini nga maka-produce sang de-kalidad nga mga atleta nga makahatag sang dugang nga mga medalya sa Pilipinas sa patag sang gymnastics.
Nahibaluan nga ginabanta P7 million ang balor sang world-class gymnastics equipment nga gin-donate sang Japan sa amo nga gym.
Yara man sa inauguration sang gym si Filipino world champion nga si Yulo nga preska pa halin sa iya nga double gold performance sa World Cup Series sa Baku, Azerbaijan.
Ginalauman nga magatinir ini sa Manila tubtub sa katapusan sang Marso antes magbalik sa Japan para liwat sa iya nga training. ##
