Naghimo sang maragtas ang Japan bilang ika-lima nga pungsod sa bilog nga kalibutan nga nakapalab-ot sang ila spacecraft sa bulan!
Kadungan ini sang kumpirmasyon sang Japan Aerospace Exploration Agency nga ang Smart Lander for Investigating Moon (SLIM) ang nakapatigayon na sang soft landing sa lunar surface 12:20 sa kaagahon (Sabado sa Japan Standard Time).
Gina-check na subong sang engineers ang status sang spacecraft kasunod sang landing.
Ang SLIM sang Japan ang makabig nga isa ka cargo research mission. Dala sini ang nanuhay-tuhay nga scientific payloads lakip ang analysis camera kag pares sang lunar rovers.
Ang small-scale nga SLIM robotic explorer nga ginlunsar sang Septyembre ang ginatawag man nga “Moon Sniper” bangud dala sini ang bag-o nga precision technology agud maka-demonstrar sang “pinpoint” landing.
Nahibaluan nga nagsunod ang Japan sa apat ka mga pungsod nga amo ang una nakalab-ot sa bulan: ang Russia (anay Soviet Union), ang U.S., China kag India.
Matandaan nga sang nagligad lamang nga tuig nakasulod ang India sa amo nga maragtas sang moon landings bangud sang ila maragtason nga Chandrayaan-3 mission.
Sang nagligad nga tuig, nagtuyo man ang Japanese company nga ispace nga makapahugpa sang spacecraft sa moon, apang nagtibusok ini kag napalpak ang mission. #
