Ginakabig nga risgo sa gihapon para sa mga jeepney drivers diri sa syudad sang Iloilo ang pag-byahe sa karon apisar nga nakabaton na ang mga ini sang fuel subsidy halin sa Iloilo City Government.
Sa interview sang Bombo Radyo kay Gabriel Jose Lorenzo, driver sang traditional jeepney, iya ginpahayag nga mabudlay ang pagbyahe sa karon kag ila na lang ginatingwaan nga makadala biskan gamay lang sa ila pamilya.
Suno pa sa iya, kinahanglan sini nga mag-antus anay sa iya obra agud nga may madala lang bisan magamay nga kinitaan sa ila balay.
Apisar pa nga may rollback sa presyo sang gatong, tuman man ini ka gamay bangud magasaka naman ang presyo sang gatong sa mga masunod nga semana.
Nagapanawagan ini sa gobyerno nga mas maayo gid tani nga mahatagan na sang solusyon ang krisis nga ginapangatubang sang pungsod.
Gindugang man sini nga ginatugyan niya nalang sa gobyerno kun magapatigayon ini sang fare hike ukon pagpataas sang plete sa mga Public Utility Jeepney (PUJ) nga madugay na nila nga ginapangayo.
