ILOILO CITY- Ginbuksan na sa mga motorista ang Jibao-an flyover pinaagi sa isa ka seremonya kahapon sang hapon.
Sa interview sang Bombo Radyo kay Engr. Sanny Boy Oropel, OIC Regional Director sang Department of Public Works and Highways Region 6, iya ginpahayag nga 24/7 ang operasyon sini.
Apang suno kay Oropel, limitado lang sa mga salakyan nga mas manubo sa 27-Tons ang bug-at ang mahimo makagamit sang flyover.
Ginadumilian naman ang mga bisekleta, tricycles, kag mga salakyan nga may masobra sa 3 axles.
Una na ginpaidalom sa dry run ang flyover sang Disyembre 11.
Ang pagbukas sang flyover ang una nga gin-schedule sa Disyembre 15.
Antes sini, una nga gin-target ang pagbukas sang flyover sang Oktubre 15 apang wala natigayon nga mahingagaw ang pagtapos sang proyekto bangud sa masami nga pag-ulan-ulan.
Nahibaluan nga may P591-million nga budget ang Jibao-an flyover kag ang kontraktor sini amo ang International Builders Corporation nga amo man ang kontraktor sang Ungka flyover.
