ILOILO CITY- Nagpangayo sang ligwa ang Department of Public Works and Highways apat ka adlaw antes ang natalana kuntani nga petsa sang pagbukas sang Jibao-an Flyover sa Oktubre 15.
Sa interview sang Bombo Radyo kay Engr. Sanny Boy Oropel, Regional Director sang Department of Public Works and Highways Region 6, iya ginpahayag nga ang masami nga pag-ulan-ulan ang kabangdanan sang delay sa pagkompleto sa flyover.
Suno kay Oropel, sa subong, samtang ginahingagaw nila ang pagpadasig sa construction sang flyover, may mga work protection sa idalum para man indi makatuga sang huol kag indi makadugang sang pagpugok sang trapiko.
Naghingyo man ini sa mga motorista sang gamay nga paghangop samtang ongoing pa ang construction sang proyekto.
Nahibaluan nga ang may P591-million nga budget ang Jibao-an flyover kag ang kontraktor sini amo ang International Builders Corporation nga amo man ang kontraktor sang Ungka flyover.
