June 3 Senate quorum nga may 12 senators, ‘lawful’ and ‘valid’ —IBP

Ginsuportahan sang Integrated Bar of the Philippines (IBP) nga legal kag valid ang sesyon sang Senado nga ginhiwat sang Hunyo 3 kun sa diin nagpungko si Senator Sherwin Gatchalian bilang Senate President Pro Tempore kag gin-islan ang committee chairmanships.

Sa ila pahayag, ginbasehan sang IBP ang Article VI, Section 16 (2) sang 1987 Constitution kag ang kaso nga Avelino v. Cuenco sang 1949 sa pagpamatuod nga legal ang pag-reconstitute sang Senado sang Miyerkules.

Suno sa IBP nga amo ang mandatory nga organisasyon sang tanan nga abogado sa Pilipinas, ginsiling nga ang tanan nga tikang, resolusyon kag desisyon nga ginhimo sa amo nga sesyon — lakip na ang pagpili kay Gatchalian bilang Senate President Pro Tempore kag ang pagpili sang bag-o nga mga chairman sang komite — ginakabig nga opisyal nga mga buluhaton sang Senado sang Pilipinas bangud sa ginatawag nga presumption of regularity sa pagtuman sang opisyal nga mga katungdanan.

Ginpaathag man sang IBP nga bangud may duha ka senador nga wala na sa gahum sang Senado nga mapatambong sa mga sesyon, ang pisikal nga presensya sang 12 ka senador ang bastante na bilang valid nga quorum.

Nakahunong subong sa presuhan si Sen. Jinggoy Estrada bangud sa kaso nga plunder kag indi naman mahibaluan ang lokasyon ni Sen. Ronald “Bato” Dela Rosa matapos nalagyo sa standing arrest warrant halin sa International Criminal Court (ICC). Bangud sini, wala sila gin-upod sa numero sang mga miyembro nga ginbasehan sa pagtumod sang quorum.

Suno sa IBP, bangud 22 lamang ka miyembro ang ginakabig nga “available” ukon mahimo makatuman sang ila katungdanan, ang presensya sang 12 ka senador bastante na agod makalab-ot sang quorum.

Matandaan nga ang majority bloc nga ginapangunahan ni Senate President Alan Peter Cayetano wala nagtambong sa plenary session sa tatlo nga sunod-sunod nga adlaw halin sang Lunes tubtub sang Miyerkules.

Si Senator Francis “Chiz” Escudero nga kaalyado pa nila sang amo nga tion ang nagkibot sa tanan sang nagtambong ini sa session hall sa diin nagahulat ang 11 ka miyembro sang minorya gani nakalab-ot sila sang quorum nga 12.

Suno sa kampo ni Gatchalian, ang quorum nga 12 ka senador ginatumod base sa kadamuon sang mga miyembro nga legal nga makahimo sang ila mga katungdanan bilang senador.

Dugang pa niya, ini tanan ang naka-angkla sa desisyon sang Supreme Court nga nagasiling nga ang absolute majority nga 12 sa 23 ka miyembro mahimo na nga magtukod sang constitutional majority sang Senado para sa katuyuan sang quorum.

Wala ginakilala sang kampo ni Senate President Alan Peter Cayetano ini nga desisyon sang Gatchalian bloc.#