Ginpahanumdom sang National Youth Commission (NYC) nga kinahanglan nga aktibo gid ang kabataan sa pagpahilabot sa mga isyu sa Pilipinas.
Sa interview sang Bombo Radyo kay NYC Chairperson and Undersecretary Joseph Francisco Ortega, iya ginpahayag nga indi mahimo nga itugyan lang sa mga pulitiko ang nagakatabo subong sa pungsod.
“Kung mga kaunting pulitiko lang ang pwedeng mag-decide sa mga budget naton, indi man pwede nga iiwan lang naton sa iba, tapos sila ang gakaon sang kwarta naton. Indi pwede na ganon kay syempre, madamo ang nagakagutom,” suno kay Ortega.
Ini ang rason suno sa iya nga nagalibot sila sa mga lugar sa pungsod agud makadtuan gid ang “grassroots” kag maistorya ang mga bata agud nga may madugang sa ila nga ihibalo.
Pagkatapos sini suno kay Ortega, oportunidad naman sang kabataan nga matudluan man ang ila mga kauturan kag ginikanan.
Nahibaluan nga nagbisita si Ortega kadungan sang 2026 Provincial Teen Center Day sa Iloilo Convention Center.
Lakip sa naistoryahan amo ang pag-practice sang cyber hygiene kag ang papel sang kabataan sa pagsabat sa mga mental health concern lakip na ang mga risgo nga naangot sa social media kag ang nagasaka nga kaso sang teenage suicide.
Nagasibo ini sa isa sa mga mayor nga programa sang komisyon nga amo ang Mental Health Youth Hub nga naga-promote sang peer-to-peer counseling.
Ini nga mensahe ni Ortega ang repleksyon man sang iya panawagan sang tinalikdan nga International Youth Day nga dapat may madalom nga involvement ang kabataan sa national policy-making kag makigbahin sa mga programa nga para sa edukasyon, palangabuhian, mental health, kag mangin sa national sovereignty issues.
 nga kinahanglan nga aktibo gid ang kabataan sa pagpahilabot sa mga isyu sa Pilipinas.){kind=link}