Ginatun-an sang kampo ni anay Negros Oriental representative Arnolfo Teves Jr. kun posible ini nga maka-apply liwat para sa political asylum sa Timor Leste.
Suno kay Atty. Ferdinand Topacio, ang legal counsel ni Teves, napatigayon ang trial sa kaso sang anay mamalidha kahapon kag magapadayon ini buwas, Marso 25.
Gindugang man sini nga napalawig pa sang 15 ka adlaw ang detention sang anay kongresista sa amo nga pungsod samtang nga nagapadayon ang trial.
Apang gin-athag man ni Topacio nga wala pa sang naistoryahan nga deportation ukon extradition kay Teves — baliskad sa una nga ginpahayag sang spokesperson kag Assistant Secretary sang Department of Justice nga si Atty. Mico Clavano.
Lakip man sa gina-istoryahan sang team nga legal move amo ang pagpasaka sang persecution kay Teves sa United Nations Human Rights Council.
Suno naman sa National Bureau of Investigation, makabig nga fugitive kag “undocumented alien” si Teves sa Timor-Leste bangud nga ginkanselar na sang Department of Foreign Affairs ang iya nga passport.
Huwebes sang hapon sang naaresto si Teves sa Dili, Timor Leste samtang nga nagahampang ini sang golf.
Siya ang ginatudlo nga mastermind sa pagpatay kay anay Negros Oriental governor Roel Degamo kag siyam ka iban pa nga tawo sang Marso 2023 — butang nga sulit-sulit man sini nga ginpanginwala.
Magluwas nga siya ang ginatudlo nga utok sa Degamo massacre, may kaso man si Teves bangud sa ginaalegar pagpapatay sa tatlo ka mga tawo sa Negros Oriental sang 2019.
Nadesignar man si Teves kag ang 11 ka iban pa nga tawo nga isa ka “terorista” sandig sa desisyon sang Anti-Terrorism Council sang Agusto 2023 bangud sa ginaalegar nga pagpamatay kag harassment sa Negros Oriental.
