ILOILO CITY- Nagaliho- liho ang mga drivers sang Metro Iloilo Transport Cooperative nga may ruta nga Tagbak,Jaro to City Proper and vice versa matapos wala makabaton saang sweldo sa sulod sang 15 ka adlaw humalin Abril 15 tubtob 30.
Sa interview sang Bombo Radyo kay Romy Edis, iya ginpahayag nga ginplastar sang bag-o nga chairman nga si Cherry Acebuche nga wala sang budget para sa ila sweldo.
Suno kay Edis, sobra 200 sila nga mga driver ang wala masweldohan bangud sa ginapahayag nga wala ma-settle nga paghalin sang anay chairman sang kooperatiba.
Ginpahayag man ni Edis nga sa katapusan kuntani sang Abril makuha nila ang sweldo apang bangud sa naglain na ang chairman sang kooperatiba, wala na ini nila nakuha.
Nagpaasalig naman ang bag-o na nga chairman nga mahatag ang sweldo sa katapusan sang Mayo.
Depensa naman sang anay chairman nga si Jose Marie Delos Reyes, wala ini nagapalagyo sa responsibilidad.
Nagpangayo naman ini sang pasaylo sa mga drivers apang suno sa iya, indi na ini sakop sang iya otoridad kag ang dapat magsabat sini amo ang mga nagapungko nga opisyal sang kooperatiba.
