ILOILO CITY – Importante para sa kapin 3,000 ka mga pulis sa Western Visayas nga makapili sang brand sang COVID-19 vaccine antes ang pagpaidalom sa full vaccination.
Ini ang naggwa sa resulta sang March 8 COVID-19 vaccine survey nga ginpatigayon sang Police Regional Office VI.
13,606 ka police personnel ang nakarehistro sa database sang PRO VI apang 13,602 pa lang ang nakasabat sa survey.
Sa mga pulis nga nakahatag na sang sabat, 8,675 ukon 63.78% ang nagpahayag nga handa magpaidalom sa vaccination; 2,924 ukon 21.5% ang mapaidalom sa vaccination kun may yara sang option ukon sarang mapilian sa mga brand sang vaccine; samtang 2,003 naman ukon 14.73% ang nagapamalibad sa bakuna.
Sa interview sang Bombo Radyo kay Pol. Lt. Col. Joem Malong, spokesperson sang PRO VI, iya ginpahayag nga nagapadayon pa man subong ang vaccine
education program sang Philippine National Police Health Service gani ginalauman nga makumbinse pa ang masobra 2,000 ka nagapang-alang-alang nga pulis
nga batunon ang bakuna.
Nahibaluan nga nag-umpisa naman ang inoculation sa PNP gamit ang CoronaVac vaccine sang Chinese firm nga Sinovac Biotech.
Sa bilog nga Pilipinas, 1,194 na ka medical front-liners sang PNP ang nakabaton sang dose sang CoronaVac.
Sang nagligad nga semana, una naman ginpahayag ni PNP deputy chief for administration Lt. Gen. Guillermo Eleazar nga 78 percent sang tanan nga PNP
personnel ang handa nga magpabakuna batok sa COVID-19.
