ILOILO CITY- Napasakaan na sang kaso ang duha ka mga suspek sa paghold-up sa delivery van sang sigarilyo sa Brgy. Pasig, Lambunao, Iloilo kun sa diin patay ang driver kag pilason naman ang duha ka pahinante.
Sa amo nga insidente, ginbawian sang kabuhi si Jerry Faldas sang Veterans Village, Iloilo City Proper samtang pilason naman sanday Elbert Mardoquio sang Cabatuan kag Jeriel Nalangan sang Calinog.
Sa interview sang Bombo Radyo kay PMaj. Jogen Suegay, hepe sang Lambunao Municipal Police Station, iya ginpahayag nga kaso nga robbery holdup with homicide kag two frustrated homicide ang ginpasaka batok sa mga identified nga mga suspek nga wala ginpangalanan apang ginapahayag nga temporaryo lamang nga nagatinir sa Lambunao.
Suno kay Suegay, hulaton na lang nila ang desisyon kun mahulugan sang warrant of arrest ang duha ka mga suspek.
