Ginalantaw sang City Health Office (CHO) ang posibilidad nga malapawan subong ang mga kaso sang firecracker related injuries sang nagligad nga tuig.
Sa interview sang Bombo Radyo kay Jan Reygine Ansino-Hortinela, Medical Officer III, Iloilo Epidemiology and Surveillance Unit, iya ginpahayag nga sa kabug-usan nga lima ka mga kaso, ang isa ka 9-anyos nga bata ang nautdan gid sang tudlo.
Samtang ang 8-anyos naman nga bata ang nag-angkon sang multiple lacerated wounds.
Suno kay Hortinela, kalabanan sa kaso ang natuga bangud sa paggamit sang boga.
Ginpahayag man sini nga mahimo pa nga magtaas ang kaso bangud tubtob Enero 6, 2025 pa matapos sila sa pag-record sang firecracker related injuries.
Nagpanugyan man ini sa kabataan nga likawan ang pagpamulot-pulot sang mga palupok nga makit-an sa dalan bangud posible pa ini nga maglupok.
