BAROTAC NUEVO, ILOILO – Ginatipon na sang Barotac Nuevo PNP ang mga kinahanglanon nga dokumento agud nga mapasakaan sang kaso ang lima ka suspek nga nag gang rape sa 13 anyos nga dalagita sa Brgy. Poblacion, Barotac Nuevo, Iloilo.
Sa interview sang Bombo Radyo kay Police Captain Kenn Albert Lepsia, hepe sang Barotac Nuevo Municipal Police Station, iya ginpahayag nga lakip sa mga dokumento nga kinahanglanon sa pagpasaka sa lima ka mga suspek amo ang medical certificate nga nagapamatuod nga ginhimuslan ang biktima, ang mga pamatuod nga ginpalapta sa social media ang sex video kag ang mga dokumento tuhoy sa identity sang mga suspek.
Nakadepende naman sa piskal suno sa hepe kun pasakaan kag presuhon man ang apat ka mga menor de edad nga suspek sa pagpanghimulos.
Sa subong, preso sa Barotac Nuevo Police Station ang isa sa mga suspek samtang ang apat ka menor de edad naman ang yara sa pag-inakop sang Department of Social Welfare and Development (DSWD).
Nahibalu-an nga ang biktima nga si alyas Ivy ang ginapahayag ginhimuslan sang mga suspek nga ginalakipan sang 19 anyos nga tumandok sang Brgy. Poblacion, 17 anyos nga tumandok sang Brgy. Guintas, 15 anyos kag 16 anyos nga tumandok sang Brgy. Tabuc Suba kag 16 anyos nga tumandok sang Brgy. Cabilauan sa nasmabit nga banwa.
