Nagpahuway lang sang makadali kag subong naguwa na ang kasugpon sang drama sa Kamara kun sa diin ang dalagan sang istorya amo ang huring-huring nga tuyo pahalinon si House Speaker Martin Romualdez.
Nabuhi liwat ang isyu sang nagpaguwa sang panibag-o nga statement si former president kag incumbent Pampanga 2nd District Rep. Gloria Macapagal-Arroyo kun sa diin ginpanginwala sini nga may plano siya nga kudeta.
Suno kay Arroyo, may report nga nagaguwa nga gin-into siya sang isa ka kongresista kag ginpapati nga may basbas pa halin kay First Lady Araneta Marcos ang kudeta.
Nagpangayo sang pasaylo ang former president nga nadalahig ang pangalan sang first lady sa iya gintawag “political fantasy” sa Kamara kag “pathetic” nga huring-huring.
“I am truly sorry that she should even be dragged into this political fantasy of a House coup — it is disrespectful to her and to her intelligence,” pahayag ni Arroyo.
Dugang pa sini sa iya nga Facebook post: “Whoever is spreading these pathetic rumors are the ones duping the Filipino people, and they should now move on to the serious business of making positive contributions to national progress.”
Tatlo ka bagay man ang ginpahangop ni Arroyo sa publiko:
Una, dapat mahangpan nga sa Pilipinas, wala sang mangin madinalag-on nga Kudeta sa Kamara kun wala sang pahanugot halin sa presidente.
Ikaduha suno kay Arroyo, may inamutan siya kun ngaa nagtingob ang pwersa sang Uniteam kag ang resulta sini nga supermajority sa Kamara nga amo suno sa iya ang mayor nga pwersa kun ngaa mapasar ang agenda sang presidente. Bangud sini suno sa former president, indi siya maghimo sang tikang agud maguba ini.
Ikatatlo suno kay Arroyo, wala siya sang gin-istorya nga kongresista ukon sin-o man nga pulitiko — aktibo man ukon retirado — diri man sa Pilipinas ukon abroad, agud nga mag-plano kag magpartisipar sa pagpahalin kay Romualdez.
Madumduman nga nag-umpisa ang isyu sang Kudeta sang ginkakas si Arroyo bilang senior deputy speaker kag gin-demote bilang deputy speaker. Nagbulos sa iya posisyon bilang senior deputy speaker si Pampanga Representative Aurelio “Dong” Gonzales, Jr.
Matandaan nga sang una naglupok ini nga isyu, mangin si Speaker Romualdez ang nagsiling nga “in order “na ang Kamara kag nakit-an pa ini nga nag-bisa kay Arroyo kag nag-upod man sa photo opportunity sa Kamara sang nagpanumpa si Gonzales. #
