Multiple stab wounds ang rason sang kamatayon sang isa ka miyembro sang Bantay Dagat nga ginapahayag gin-harass sang illegal fishers samtang nagapatigayon sang sea patrol operation sa Nueva Valencia, Guimaras.
Ang biktima amo si Nelson Bordon, residente sang Barangay Guiwanon, Nueva Valencia.
Pebrero 24 sang natabo ang engkwentro sa tunga sang Bantay Dagat Task Force kag sang illegal fishers nga ginapahayag taga-Negros Occidental.
Tatlo sa mga kaupod ni Bordon ang nakaluwas sang hungod nga ginbungguan sang fishing vessel sang illegal fishers ang bangka sang Bantay Dagat.
Gindala naman sang mga illegal fishers si Bordon.
Pebrero 27 sang nasapwan nga nagautaw-utaw ang bangkay ni Bordon sa baybayon nga sakop sang Malingin Island sa Barangay Guiwanon.
Sa interview sang Bombo Radyo kay Police Corporal Demcent Villa, imbestigador sang Nueva Valencia MPS, iya ginpahayag nga santo sa autopsy result, indi pagkalumos kundi mga pilas bunga sang pagkastigo ang rason sang kamatayon sang biktima.
May mga persons of interest na ang mga pulis kag ipasaka ang kaso kun makatipon na sang bastante nga ebidensya.
