ILOILO,CITY– Naghingyo ang isa ka miyembro sang LGBTQ sa mga owtoridad nga kun mahimo sya ang ibutang sa separar nga karsel kag indi pag isimbog sa mga kalalakihan matapos ini ang nadakpan sa ginpatigayon nga drug buy bust operation sa Brgy. Rizal-Estanzuela City Proper.
Ang arestado ginkilala si Mark Joseph Parreño Maestrecampo 30-anyos kag residente sang nasambit nga lugar.
Ang drug buy bust operation ginapatigayon sang City Drug Enforcement Unit kag Police Station 1.
Narekober sa iya nga posisyon ang pito ka sachet sang suspected shabu kag Php1,100 buy bust money.
Suno sa arestado, nagakabalaka sya sa kun ano ang matabo sa iya kun isimbog sya sa karsel sang mga kalalakihan.
Sa interview sang Bombo Radyo kay Police Col. Jonathan Pablito hepe sang Police Station 1, iya ginpahayag nga madugay na nga ginamonitor sang kapulisan si Maestrocampo.
May kaangatanan naman sa ginahingyo sang arestado, ginpahayag ni Pablito nga mahimo akomodaron ang iya luyag ini kun may yara sang bakante ang karsel sang mga babaye apang nagpasigurado siya nga wala pa sang may natabo nga ginbastos ang katapo sang LGBTQ sa sulod sang presinto.
