ILOILO CITY- Siga,hari-hari, kag tunto sa barangay ang ginapahayag ‘gang leader’ nga labing una nga nadakpan nga naglapas sa Comelec gun ban sa Iloilo City.
Ang arestado amo si RD Elado alyas ‘The Rock’, 22 anyos, residente sang Zone 4 Brgy. Calumpang, Molo Iloilo City nga nakuhaan sang 12″ nga kutsilyo.
Sa interview sang Bombo Radyo kay PEMS Ruth Laudato sang Women and Children’s Protection Desk, iya ginpahayag nga base sa resulta sang ila background check, si The Rock ang involved sa pila ka kinagamo kag under monitoring ini sa ila barangay bangud tuman ini ka salawayon.
Suno kay Laudato, si Elado ang ginatudlo nga nagapang-recruit sang kabataan agud mangin myembro sang gang nga ginatawag nga BSS- Black Simple Street Junior.
Ginpahayag ni Laudato nga ang nasambit nga gang ang may yara na sang 154 ka members- 125 diri ang minors kag 29 naman ang nagaedad sang 18 pasaka.
Naggwa man sa imbestigasyon nga may groupchat ang gang ni ‘The Rock’ kag ang kontra nila nga gang kun sa diin diri sila nagahagaday nga magkitaay kag mag-ilinaway.
