ILOILO CITY- Gin-cancel ni Iloilo City Mayor Jerry Treñas ang klase sa tanan nga levels sa Iloilo City bangud sa lapnagon kag malawig nga pagkadula sang suplay sang kuryente.
Gintumod sang alkalde ang pila ka oras nga blackout sa siyudad nga nagsugod alas-tres kahapon sang hapon.
Sa statement sang alkalde, ginsiling niya nga wala pa sang maathag nga resolusyon sa power problem.
Gin-athag sini nga ang klase lang ang kanselado kag indi ang trabaho.
Nagpangabay man ini sa National Grid Corporation of the Philippines nga maghatag sang regular updates tuhoy sa blackout kag magpangita sang mas sustainable nga solusyon.
Nagpanawagan naman ang alkalde sa Energy Regulatory Commission, Department of Energy kag iban nga regulatory bodies nga pasabton ang National Grid Corporation of the Philippines sa natabo.
Sa bahin naman sang Kalibo sa Aklan, may ginpatuman man nga cancellation of classes sa tanan nga lebel, pribado man ukon pampubliko base sa announcement ni Kalibo Mayor Juris Sucro.
