ILOILO CITY- Suspendido sa gihapon ang klase sa Iloilo City subong nga adlaw, Agusto 30, halin sa preschool tubtob senior high school sa pribado kag pampubliko nga mga buluthuan.
Sa interview sang Bombo Radyo kay Iloilo City Mayor Jerry Treñas, iya ginpahayag nga katuyuan sang suspension of classes amo nga malikaw ang mga estudyante sa mga flood related nga mga balatian kaangay sang leptospirosis.
Suno sa alkalde, madamo man nga mga pamilya ang nagapabilin sa evacuation centers kag may mga barangay sa gihapon nga ginabaha.
Gin-athag naman sang alkalde nga wala nasakop sang suspension of classes ang college level bangud nga napaidalom ini sa Commission on Higher Education gani ang university official ang may discretion kun isuspend ang klase ukon indi.
