ILOILO CITY- Sa masami, ang empleyado nalang ang nagapangita sang paagi agud nga mag-resign ini sa iya ginaubrahan.
Apang, may ara sang isa ka kompaniya nga ini mismo ang nangita sang paagi agud nga mag-resign ang iya mga empleyado.
Didto ini sa Shanxi Province sa China kun sa diin may yara sang isa ka advertising agency nga nagsaylo sang ila opisina sa tuman ka layo nga lugar sa putok-putokan sang bukid agud mabudlayan ang ila mga empleyado nga magpadulong didto bangud limitado lamang ang salakyan.
Ang natabo, matapos ang pila ka semana, sa 20 nga mga empleyado, abaw, 14 gid ang nag-resign.
Sang nag-resign na ang mga empleyado, isa pa gid ka, abaw, kay nagbalik na sa ila orihinal nga opisina ang kompaniya.
Suno sa mga empleyado, kaangay nga ginhungod gid sand kompaniya ang ila ginhimo agud maghalin ang nasambit nga mga employees kag makalikaw sila sa paghatag sang ila kompensasyon.
Sa subong, gindangop na sang mga nag-resign nga empleyado sa korte ang ila reklamo bangud sa ginhimo sang kompaniya.
