Ginalauman ni Ako Bicol Party-list Representative Alfredo Garbin Jr. nga isugid ni former Representative Zaldy Co ang tanan nga iya nahibaluan kun madala na ini pabalik sa Pilipinas matapos naaresto sa Prague, Czech Republic.
Suno kay Garbin, madamo pa sang wala nasugid si Co nga amo anay ang chairman sang Appropriations Committee sang Kamara.
Kuntani suno kay Garbin, mahatagan ini sang due process sa idalom sang layi, kag pagkatapos, mabuyagyag na sini ang tanan.
Sa separado naman nga statement, nagpahayag si Bicol Saro Party-list Rep. Terry Ridon nga makahatag si Co sang dugang nga mga impormasyon kaangot sa mga anomaliya sa flood control projects sa Pilipinas.
Mahatagan man ini sang tyansa suno kay Ridon nga maka-atubang sa mga kaso nga ginpasaka sa iya sa Sandiganbayan.
Matandaan nga sang Marso, ginpabakod pa sang Sandiganbayan ang deklarasyon nga si Co isa ka “fugitive from justice.”
Sandig sa kumpirmasyon ni President Ferdinand Marcos, Jr. kagab-i, gin-aresto si Co sang nagtabok ini sa Czech Republic nga wala sang nagakaigu nga documentation.
Naka-detain na ini subong sa amo nga pungsod.
Suno kay Marcos, nagapakig-angot na ang Philippine government sa Czech Republic agud nga madala pauli ang amo nga kongresista.
Sundon suno sa presidente ang tanan nga legal nga proseso, kag nagpasalig man ini nga padayon nga ipahibalo sa publiko ang tanan nga development.
Nahibaluan nga wanted si Co halin sang Nobyembre 2025 bangud sang kaso nga graft kag malversation nga naangot sa mga anomaliya sa P289.5-million flood control project sa Oriental Mindoro.
Nag-resign siya bilang congressman sang Septyembre 2025 matapos gin-akusaran nga mastermind sang binilyon ka pesos nga flood control kag iban pa nga infra budget insertions sa 2025 budget.
Sa sunod-sunod nga mga expose sini sang 2025, gin-implicate sini si Marcos kag former House Speaker Martin Romualdez sa binilyon ka pesos nga insertions sa 2025 national budget.
Nagpanindugan ini nga nagsunod lamang siya sa mga mandu kaangot sa ginaalegar nga budget insertions.
