ILOILO CITY- Nagpatigayon sang consultation dialogue ang transport stakeholders sa probinsya sang Iloilo may kaangtanan sa Developmental Route sang Local Public Transport Route Plan (LPTRP).
Ini ang gintambungan sang mga chairpersons sang Committee on Transportation sang Sangguniang Bayan sang mga munisipalidad nga apektado sang Developmental Route, Municipal Planning and Development Coordinators (MPDCs), mga tiglawas sang Department of Interior and Local Government (DILG) kag Land Transportation Franchising and Regulatory Board (LTFRB).
Sa interview sang Bombo Radyo kay Mr. Mario Nillos, head sang Provincial Planning and Development Office(PPDO), iya ginpahayag nga pila sa mga concerns nga gin-raise amo ang may kaangtanan sa mga tricycle nga nagabyahe sa national roads, numero sang designated fleet nga magabyahe sa rationalized kag consolidated routes, modernized jeepneys nga nagabyahe sa 1st towns padulong sa city route, kag iban pa.
Suno kay Nillos, isa sa mga butang nga ginahatagan nila subong sang atensyon amo ang kabalaka sang mga tricycle operators kag drivers nga madulaan sila sang source sang income sa tion nga ma-penetrate na sang mga modernized jeepneys ang ila ruta.
Pahayag ni Nillos, may serye pa sang mga konsultasyon sa masunod nga mga binulan antes nila ipasa sa Department of Transportation(DOTr) paagi sa LTFRB ang final nga Provincial Transport Route Plan (PTRP) para sa approval.
